Янгиликлар

18.10.2022

2-умумтаълим мактаби ташкил этилганига 100 йил тўлди. Шу муносабат билан  зиё масканига устоз-муаллимлар, ота-оналар, ушбу даргоҳда таҳсил олиб, айни пайтда жамият ҳаётининг турли жабҳаларида фаолият юритаётган собиқ битирувчилар ҳамда жамоатчилик вакиллари ташриф буюрдилар.1922 йилда қурилган мактабда ҳозирда 1067 нафар ўғил-қиз таҳсил олади. 68 нафар педагог ёш авлоднинг порлоқ келажаги йўлида камарбаста. Тадбирда иштирок этган вилоят  ҳокимининг ўринбосари  Ғуломжон Муродхўжаев вилоят ҳокимининг табригини ўқиб эшиттириб, жамоада узоқ йиллардан буён самарали фаолият кўрсатиб келаётган фидоий устозларни муборакбод этди. Шунингдек, Уйчи тумани ҳокими Шуҳрат Мусаев, Поп тумани ҳокими, мактабнинг собиқ ўқувчиси Аъзамжон Султонов, шоир Зиёвиддин Мансуров, маҳалла ва нуронийларни қўллаб-қувватлаш туман бўлими бошлиғининг маслаҳатчиси Тоҳиржон Исматиллаев самимий тилаклар билдиришди.  Шодиёна мактабнинг истеъдодли ва иқтидорли ўқувчилари томонидан ижро этилган куй-қўшиқ, рақслар билан янада тантанавор тус олди. Таниқли хонанда Хуршид Расулов,  “Ўзбекистонда хизмат кўрсатган артист”, “Дўстлик” ордени соҳибаси Меҳри Абдуллаева, туман маданият бўлими хонандалари ижросидаги қўшиқлар барчага хушнудлик бағишлади.

18.10.2022

Уйчи туманидаги 26-мактабда тумандаги таълим муассасаларини 2022-2023 йиллар куз-қиш мавсумига пухта тайёрлаш ҳамда мавсумни беталофот ўтказиш, тармоқлар бир меъёрда ишлашини таъминлаш мақсадида ўқув амалий семинар ташкил этилди.

Семинарда туман ХТБ мудири М.Мўминов, туман ФВБ вакили Ш.Носиров, туман СЭО ва ЖСБ санитария бўлими врачи Соҳибжон Турсуновлар сўзга чиқиб, куз-қиш мавсумига тайёргарлик кўриш ва уни беталофат ўтказиш, ёнғин хавфсизлиги қоидаларига риоя қилиш, иситиш қозонхоналари ва дудбуронларини синовдан ўтказиш, дастлабки ёнғин ўчириш анжомлари созлигини таъминлаш, ис гази ва ботулизмдан заҳарланишнинг олдини олиш ҳамда бирламчи ёнғин ўчириш воситаларидан тўғри фойдаланиш бўйича тушунтиришлар беришди.

18.10.2022

Уйчи жисмоний тарбия ва спорт техникуми фаоллар залида "Кексалари эъзозлаган юрт" мавзусида маънавий-маърифий тадбир бўлиб ўтди.

Ровот маданият маркази ташаббуси билан ўтказилган ушбу тадбирда ҳамкор ташкилотлар - маҳалла ва нуронийларни қўллаб- қувватлаш туман бўлими маслаҳатчиси Т.Исматиллаев, Республика Маънавият ва маърифат маркази Уйчи туман бўлинмаси раҳбари Э.Юнусова, Ўзбекистон ХДП туман кенгаши раиси Ғ.Жўраев, меҳнат фахрийси Т. Худойбердиевлар шукроналик, оилаларни мустаҳкамлаш, ёшлар тарбияси ҳақида таъсирчан мулоҳазалар билдирдилар.

Хонанда Умиджон Ҳайитмирзаев дилрабо қўшиқлари билан тадбирга файз киритди.

17.10.2022

Ta’lim kreditlari bakalavr hamda magistraturaning kunduzgi, sirtqi va kechki ta’lim shaklida to‘lov-kontrakt asosida o‘qishga tavsiya etilgan yoki qabul qilingan, shuningdek o‘qishini ko‘chirgan O‘zbekiston fuqarosi bo‘lgan talabalarga beriladi.

Unga ko‘ra, kredit oluvchining doimiy daromad manbaiga ega oila a’zolari  yoki vasiylari birgalikda kredit oluvchi sifatida qatnashishi mumkin.

 Ta’lim kreditini olish uchun Moliya vazirligining rasmiy veb-saytida e’lon qilingan tijorat banklariga quyidagi hujjatlar taqdim etiladi:

• ariza;
• to‘lov-kontrakt shartnomasi va unga ilova qilinadigan hisob varaqasi/fakturasi (mavjud bo‘lganda). Shartnomada o‘qishni tamomlashning belgilangan muddati va bir yil uchun to‘lov miqdori ko‘rsatilgan bo‘lishi lozim;
• ta’lim krediti qaytarilishining ta’minoti bo‘yicha hujjat. Bunda “Ijtimoiy himoya yagona reyestri"ga kirgan oilalarning farzandlariga ajratiladigan ta’lim krediti bo‘yicha garov va kafillik talab etilmaydi;
• “Ijtimoiy himoya yagona reyestri"ga kiritilgan oilalar farzandlari uchun tasdiqlovchi ma’lumotnoma;
• birgalikda kredit oluvchiga tegishli ma’lumot.

Hujjatlar 5 ish kunida ko‘rib chiqiladi.

Ta’lim krediti shartnomasi to‘lov-kontrakt shartnomasida ko‘rsatilgan bir yillik to‘lov summasiga teng miqdordagi summaga tuziladi hamda u Markaziy bankning asosiy stavkasi miqdorida ajratiladi.

  Markaziy bankning asosiy stavkasi pasaytirilgan taqdirda, ta’lim krediti bo‘yicha foiz stavkasi mutanosib ravishda pasayadi, yoki asosiy stavka oshirilgan taqdirda ta’lim krediti bo‘yicha foiz stavkasi o‘zgarishsiz qoladi.

Ta’lim krediti olinganda uni to‘lash uchun sarflangan mablag‘lar daromad solig‘idan ozod etiladi. 

Uychi Yuridik hizmat ko`rsatish markazi

bosh yuriskonsulti:                                                                    I.Davranov

15.10.2022

Уйчи туманининг 2-сектори ҳудудида жойлашган Ёркатай кичик саноат зонасида умумий қиймати 115 млрд. сўмлик 26 та лойиҳа амалга оширилиши кўзда тутилган.

Бу ерда сув, электр, йўл масаласидаги муаммолар бартараф этилди. 861 та янги иш ўрни яратилиши кўзда тутилган.

Уйчи тумани ҳокими Шуҳрат Мусаев ҳамда мутасадди ташкилотлар раҳбарлари мазкур саноат зонасида бўлиб, лойиҳа эгалари билан суҳбатлашишди ҳамда қурилиш ишларини жадаллаштириш, лойиҳаларни тезроқ ишга тушириш, шу билан бирга, ободонлаштириш ишларини ташкиллаш бўйича тавсиялар бердилар. Мурожаатлар ўрнида ҳал этилди.